Enjamlaryňyz ogurlanan, alnan ýa-da zeperlelen bolsa, möhüm dokumentleriňize hemişe girip bilmegiňiz gerek bolar. Eger öňünden meýilleşdirseňiz, ýitgileriňizi azaldyp bilersiňiz.
Maglumat ýitmeginiň dürli görnüşleri
Maglumatlar birnäçe sebäplere görä zaýalanyp ýa-da ýitip biler. Olara programma üpjünçiligi ýa-da enjam näsazlygy girýär we bu zatlar käwagt duýdansyz we düşnüksiz bolup geçýär. Şeýle-de, tötänleýin pozmak ýaly, ulanyjynyň ýalňyşlyklary we häkerleriň, wiruslaryň, zyýanly programma üpjünçilikleriniň hem-de töleg programma üpjünçilikleriniň hüjümleri sebäpli maglumatlar ýitip bilýär.
- Elektrik togunyň öçmegi (ýa-da elektrik togunyň ýokarlanmagy (повышение напряжение)) maglumatlaryň birden pozulmagyna ýa-da gaty diskleriň ätiýaçlyk nusgalarynyň näsazlygyna getirýän sebäpleriň köp ýaýranlaryndan biridir.
- USB fleşkalary ýa-da daşky gaty diskleri ilki çykarmazdan ozal howpsuz aýyrmak düwmesine (извлечь) basman, kompýuterden göni aýyrmak hem maglumatlaryň ýitmegine getirip biler.
- Faýl ulgamynyň (gaýtadan) formatlaşdyrylmagy ýa-da programma üpjünçiliginiň näsazlyklary faýllaryň zeperlenmegine ýa-da maglumatlaryň formatlanmagyna we ulanyp bolmaýan ýagdaýa gelmegine sebäp bolup biler.
- Tötänleýin pozmak – garaşylmadyk ýagdaýda maglumatlaryň ýitmeginiň has giňden ýaýran sebäpleriniň biri diýseň hem bolýar. Bagtymyza, şeýle maglumat ýitgileri adatça enjamyň operasion ulgamyna baglylykda, maglumatlary dikeldýän programma üpjünçiligi arkaly dikeldilip bilner.
- Elbetde, kiber hüjümlerini hem maglumatlaryň ýitmeginiň sebäpleriniň sanawyna goşmaly. Wirus bolsun ýa-da zyýanly programma üpjünçiligi, ýa-da bir enjama rugsatsyz girýän häker bolsun, ol kiber-hüjümler arkaly maglumatlaryň bozulmagyna ýa-da ýitmegine getirip biler. Maglumatlara ýetirilen zyýanyň derejesine görä, faýl dikeldýän programma üpjünçiligi, adatça, ýitirilen maglumatlaryň azyndan käbirlerini dikeltmäge kömek edip biler.
Pozulan ýa-da ýitirilen maglumatlary dikeltmek
Enjamyňyz pozulan maglumatlaryň üstünden täze maglumatlary ýazan bolsa, maglumatlary dikeldýän gurallar işlemeýär. Mümkinçiligiňiz bolsa, faýllary dikeltmäge synanyşýançaňyz (ýa-da kimdir biri muny size edip berýänçä) enjamyňyzy ulanmaň. Enjamyňyzda bir zatlar etseňiz, ýitirilen faýllaryň üstüne gaýtadan bir zatlaryň ýazylmagyna we dikeldilmezligine sebäp bolup biler. Faýly dikeltmezden ozal kompýuteriňizi näçe uzak ulansaňyz, şonça-da faýlyň dikeldilmeginiň ähtimallygy azalar.
Haçan-da faýly pozanyňyzda, ol ekranyň ýüzünden ýitýär, ýöne enjamyňyzda galýar. Hatda zyňyndylar sebedinden (корзина) pozanyňyzdan soň hem, faýllary gaty diskiňizde tapyp bolýar. Ýöne, möhüm bir faýly tötänleýin pozsaňyz, bu siziň peýdaňyza hem bolup biler. Käbir programmalar täzelikde pozulan faýllary dikeldip biler.
“Recuva” ýaly maglumatlary dikeldýän programma üpjünçiliginiň enjamyňyza gurnamazdan işleýän göçme wersiýasyny ulanmak dogry hasaplanýar. Eger programmany gurnasaňyz, dikeltjek bolýan faýlyňyzyň üstünden tötänleýin şol programmanyň ýazylmagy mümkin.
Köp halatda, dikeldip bilinjek käbir maglumatlar bar we 100% maglumat ýitirilmegi seýrek bolup geçýär. Bu düzgüniň kadadan çykmalary, ýatda saklanylmadyk dokumentler ýa-da üstünden gaýtadan ýazylan maglumatlardyr. Bu ýagdaýlarda maglumatlaryňyzy mundan beýläk täzeden görüp bilmersiňiz we şeýle maglumatlary dikeltmegi wada berýän islendik faýl dikeldiş programma üpjünçiliginden ägä bolmalysyňyz.
Çeşmeler: securityinabox.org / techradar.com
