“Microsoft”-yň websaýtyndan ýa-da kompýuter dükanlaryndan hakyky lisenziýaly satyn alynmadyk “Windows” operasion ulgamynyň göçürmesine “pirat” (пиратская версия) nusgasy diýilýär. Ulanyjylaryň köpüsi pul berip almazlyk üçin, internetden “Windows”-yň açylan (взломанная, активированная) görnüşini almagy dogry hasaplaýarlar. Emma, ulgamyň pirat görnüşini ulanmak bikanundyr we birnäçe töwekgelçiliklere salýar:
- “Windows”-yň täzelenmelerinden peýdalanyp bilmersiňiz
“Microsoft” kompaniýasy täze funksiýalary goşmak, ozalky ýalňyşlyklary düzeltmek we howpsuzlygyny kämilleşdirmek arkaly “Windows” operasion ulagymyny yzygiderli täzeläp durýar. Eger-de “Microsoft” siziň “Windows” operasion ulgamyňyzyň bikanundygyny (pirat görnüşidigini) anyklasa, “Microsoft” siziň “Windows”-yňyz üçin täzelemeleri hödürlemegi bes eder. “Windows”-yňyzy täzeläp durmasaňyz welin, siz täze çykan funksiýalardan peýdalanyp bilmersiňiz, kem-kemden operasion ulgamyňyzyň durnuklylygy we howpsuzlygy peseler.
- Maglumatlaryňyz howp astynda bolar
Eger-de siz kompýuteriňizde şahsy we gizlin dokumentleriňizi saklamak isleýän bolsaňyz, onda “Windows”-yň pirat görnüşi size düýbünden gabat gelmez. Sebäbi pirat görnüşi zyýan ýetiriji programmalara hem-de wiruslara garşy durnuksyzdyr. Wirus ýa-da zyýan ýetiriji programma kompýuteriňize düşse, ol siziň ähli maglumatlaryňyzy üýtgedip ýa-da pozup biler. Şular ýaly ýagdaý ýüze çykan mahalynda, elbetde, siz “Microsoft” kompaniýasyndan kömege garaşyp bilmersiňiz.
- “Microsoft”-yň başga önümlerine ýetirilýän täsir
“Microsoft”-yň başga önümlerini arkaýyn ulanyp bilmezlik “Windows”-yň pirat nusgasynyň ýene-de bir kemçiligidir. “Windows”-yň açarynyň hakyky däldigi islendik wagt ýüze çykarylyp bilner. Netijede, siz “Microsoft” kompaniýasynyň tölegli hyzmatlaryny satyn alan bolsaňyz hem, olary doly derejede ulanyp bilmersiňiz.
- Häkerler sizi yzarlap biler
Haçan-da “Windows” hakyky açar bilen işledilende, ol gönümel “Windows”-yň öz serwerine baglanýar. Eger-de siziň açaryňyz hakyky bolmasa, birigen serweriňiziň sizi yzarlamaga mümkinçiligi bolar we kompýuteri ulanan mahalyňyz ähli wajyp maglumatlaryňyz gizlin ýagdaýda şol serwere ýüklener. Siziň şahsy maglumatlaryňyzyň ogurlanmagyndan başga-da, häkerler gizlin maglumatlaryňyzy üýtgedip bilýärler.
Maglumatlaryňyzy we özüňizi gorap saklamak üçin, lisenziýaly “Windows”-y ulanmak iň gowusydyr. Täzelenmeler operasion ulgamyň gowy derejede işlemegine ýardam berýär.
Eger siz lisenziýaly “Windows”-y satyn alyp bilmeýän bolsaňyz, onda iň bolmanda “Microsoft Windows”-yň mugt görnüşini ulanyň. Mugt görnüşinde käbir funksiýalar elýeter däl, ýöne “Windows”-yň pirat görnüşiniň töwekgelçiliklerinden daşrakda durarsyňyz.
Eger-de siz “Windows”-y ilkinji gezek satyn alyp, gurnamak isleýän bolsaňyz, onda operasion ulgamyňyzyň täzelenmeleriniň sazlanmagyny hem-de “Microsoft Defender”-i gurnamagy we ätiýaçlyk nusgalaryňyzy meýilleşdirmegi unutmaň.
