Palaw Indeksi Maý / 2025

Maý 2025: Palaw Bahalary 15.4% Gymmatlady.

2025-nji ýylyň maý aýynda Aşgabatda palaw taýýarlamagyň ortaça bahasy 69.5 manada ýetdi. Bu görkeziji 2024-nji ýylyň maý aýyndaky 60.2 manat bilen deňeşdirilende 15.4% ýokarydyr. Mundan başga-da, geçen aýdaky, ýagny 2025-nji ýylyň aprel aýyndaky 68.3 manat bilen deňeşdirilende, palawyň bahasy 1.8% ýokarlandy. FAO-nyň Azyk Bahalary Indeksine görä bolsa, halkara azyk bahalary 2025-nji ýylyň maý aýynda 6.0% ýokarlandy.

Aşgabatda Esasy Önümleriň Ýyllyk Bahasyndaky Üýtgeşmeler

2025-nji ýylyň maý aýynda Aşgabatda palaw taýýarlamak üçin zerur bolan käbir önümleriň bahasy peselse, beýlekileriniňki ýokarlandy. Tüwiniň bahasy iň uly peselişi görkezdi we ýylyň dowamynda 23.7% arzanlady. Käşiriň bahasy 17.1%, günebakar ýagynyňky bolsa 0.6% pese düşdi. Munuň bilen bir wagtda, beýleki esasy önümleriň bahalary ýokarlandy. Soganyň bahasy iň ýokary ösüşi görkezdi we 95.4% gymmatlady. Şeýle hem, sygyr eti 35.0%, bugdaý uny bolsa 23.9% ýokarlandy (Netije 1-e serediň).

FAO Indeksine Görä Dürli Kategoriýalarda Halkara Bahalaryndaky Üýtgeşmeler:

• FAO Ösümlik Ýagynyň Bahasy Indeksi 2025-nji ýylyň maýynda ýyldan-ýyla 19.1% ýokarlandy, emma geçen aý (aprel 2025) bilen deňeşdirilende 3.7% arzanlady. Günebakar ýagy halkara importlaryň azalmagy netijesinde arzanlady.
• FAO-nyň Galla Önümleri Indeksi bugdaýyň we beýleki däne önümleriň bahasyny öz içine alýar we 2025-nji ýylyň maýynda ýyldan-ýyla 8.2% pese düşdi.
• FAO Tüwi Indeksi maýda 1.4% gymmatlady. Bu hoşboý ysly sortlara bolan islegiň artmagy we Indica sortynyň bahasynyň ýokarlanmagy bilen düşündirilýär.
• Şol bir wagtyň özünde, FAO Et Bahasy Indeksi 6.8% ýokarlandy. Bu bolsa halkara islegiň ýokarlanmagy we esasy öndüriji ýurtlaryň eksportlarynyň birneme azalmagy bilen düşündirilýär.

Metodologiýa

Palaw ingredientleriniň bahalary çöplenilen wagtynda soganyň, käşiriň, etiň, tüwiniň we unuň 1kg bahasy we günebakar ýagynyň 1 litr bahasy çöplenildi. Biziň metodologiýamyza görä, 4 adamdan ybarat bolan maşgalada palaw bişirmek üçin biz öz formulamyzda günebakar ýagynyň 0.3 litrini, soganyň ýarym kilesini, käşiriň 1 kilesini, etiň 600 gramyny, tüwiniň 1 kilesini we bugdaý ununyň ýarym kilesini ulandyk. Bahalaryň hemmesi hususy dükanlardan ýygnalan. Palaw Indeks metodologiýasy barada has giňişleýin maglumaty öwrenmek üçin şu salga basyň.